ጨው ለሰውነታችን እጅግ አስፈላጊ ነው። የፈሳሽ መጠንን ለማመጣጠን፣ የነርቭ ስርዓት ስራን ለማገዝ፣ እና የጡንቻዎችን እንቅስቃሴ ለማስተካከል ይጠቅማል። ነገር ግን አብዛኞቻችን ሳናውቀው ከሚያስፈልገን በላይ ጨው (ሶዲየም) እንወስዳለን፤ ምክንያቱም በፋብሪካ በተቀነባበሩ እና በታሸጉ ምግቦች ውስጥ ጨው በብዛት ተደብቆ ይገኛል። በዚህ Ethio Health ጽሁፍ፣ ከመጠን በላይ ጨው እየወሰዱ መሆኑን የሚጠቁሙ 9 ምልክቶችን፣ የሚያስከትላቸውን የጤና እክሎች፣ እና ጨውን ለመቀነስ የሚረዱ ተግባራዊ ምክሮችን እንመለከታለን።
ከመጠን በላይ ጨው እየወሰዱ እንደሆነ የሚጠቁሙ 9 ምልክቶች
1. የሆድ መነፋት ስሜት
በሰውነታችን ውስጥ ያለው የጨው መጠን ሲጨምር፤ ሰውነት ፈሳሽ እንዲቋጥር ያደርገዋል። ይህም ሆድዎ እንዲነፋ ወይም እንዲወጠር ያደርጋል።
2. ከፍተኛ የደም ግፊት
ከመጠን በላይ ጨው መውሰድ፤ ኩላሊታችን ትርፍ ፈሳሽን ከሰውነታችን ውስጥ ለማስወገድ እንዲቸገር ያደርገዋል። ይህም በጊዜ ሂደት ለከፍተኛ የደም ግፊት ምክንያት ይሆናል።
3. የፊት ወይም የእጅና እግር ማበጥ
በፊትዎ፣ በእጆችዎ፣ በእግሮችዎ ወይም በቁርጭምጭሚትዎ አካባቢ እብጠት ካስተዋሉ፤ ሰውነትዎ በጨው መብዛት ምክንያት ፈሳሽ እየቋጠረ መሆኑን የሚያሳይ ምልክት ሊሆን ይችላል።
4. ሁልጊዜ የሚያጠማዎት ከሆነ
በደማችን ውስጥ የጨው መጠን ሲበዛ የሰውነታችን ሴሎች የውሃ እጥረት ያጋጥማቸዋል። ሰውነታችን መጠኑን ለማስተካከል ከፍተኛ የውሃ ጥም ስሜት እንዲሰማን ያደርጋል።
5. በአጭር ጊዜ ውስጥ ክብደት መጨመር
በአንድ ወይም በሁለት ቀን ውስጥ ድንገት የሰውነት ክብደትዎ ከጨመረ፤ ይህ ምናልባት የተቋጠረ ፈሳሽ እንጂ ስብ ላይሆን ይችላል።
6. በተደጋጋሚ ሽንት ቤት መመላለስ
ጨው ያስከተለውን ጥማት ለማርካት ብዙ ውሃ ሲጠጡ፤ ያንን ፈሳሽ ለማስወገድ በተደጋጋሚ ወደ ሽንት ቤት መመላለሳችን አይቀሬ ነው።
7. የእንቅልፍ ማጣት ወይም መረበሽ
በተለይ ወደ መኝታ ከመሄድዎ በፊት ጨው የበዛባቸውን ምግቦች መመገብ፤ እንቅልፍ እንዲያጡ እና ሌሊት ላይ በተደጋጋሚ ከእንቅልፍዎ እንዲነቁ ሊያደርግ ይችላል።
8. የድካም ወይም የመዛል ስሜት
ከመጠን በላይ ጨው የሰውነትን የፈሳሽ ምጣኔ ሲያዛባው፤ የጡንቻ መዛል ወይም አጠቃላይ የድካም ስሜትን ሊያስከትል ይችላል።
9. የሆድ ህመም ወይም መረበሽ
ከመጠን በላይ የጨው መጠን፤ ለሰውነት ድርቀት፣ ለማቅለሽለሽ፣ ለሆድ ቁርጠት፣ ወይም በአንዳንድ ሰዎች ላይ ለተቅማጥ መንስኤ ሊሆን ይችላል።
ጨው ማብዛት በረጅም ጊዜ የሚያስከትላቸው የጤና እክሎች
- ከፍተኛ የደም ግፊት
- የልብ ህመም እና የልብ ድካም
- ስትሮክ (ድንገተኛ የደም መፍሰስ ወይም መዘጋት በአንጎል ውስጥ)
- የኩላሊት ህመም እና የኩላሊት ጠጠር
- የአጥንት መሳሳት (Osteoporosis)
- የጨጓራ ካንሰር
የጨው አጠቃቀምን ለመቀነስ የሚረዱ ጠቃሚ ምክሮች
ትኩስ ምግቦችን ያዘውትሩ፦ በፋብሪካ ከተቀነባበሩና ከታሸጉ ምግቦች ይልቅ ትኩስ እና ተፈጥሯዊ የሆኑ ምግቦችን (አትክልት፣ ፍራፍሬ፣ ስጋ) አዘውትረው ይመገቡ።
ማሸጊያዎችን ያንብቡ፦ የታሸጉ ምግቦችን ሲገዙ የሶዲየም መጠናቸውን በማሸጊያ ወረቀታቸው ላይ አይተው አነስተኛ የሆነውን ይምረጡ።
በቅመማ ቅመሞች ይተኩ፦ በምግብዎ ላይ ጨው ከመጨመር ይልቅ በቅመማ ቅመም፣ በነጭ ሽንኩርት፣ በሎሚ እና በኮምጣጤ ምግብዎን ያጣፍጡ።
ጨው የሌላቸውን ይምረጡ፦ "low-sodium" ወይም "no-salt-added" የሚሉ ምርቶችን ይምረጡ።
ከቤት ውጪ ሲመገቡ ይናገሩ፦ ሬስቶራንት ወይም ምግብ ቤቶች ሲመገቡ ምግብዎ በትንሽ ጨው እንዲሰራላችሁ አስቀድመው ይንገሩ።
በእለት ተእለት የአመጋገብ ዘይቤያችን ላይ የምናደርጋቸው ጥቃቅን ለውጦች፤ ለልባችን፣ ለኩላሊታችን፣ እና ለአጠቃላይ ጤንነታችን ትልቅ ልዩነት ያመጣሉ።
ማሳሰቢያ: ይህ ጽሁፍ አጠቃላይ የጤና መረጃ ለመስጠት እንጂ የግል የህክምና ምክር ለመተካት አይደለም። ስለ አመጋገብዎ ወይም ስለ ደም ግፊትዎ ስጋት ካለዎት ሐኪም ማማከር ይመከራል።
ምንም አስተያየቶች የሉም:
አስተያየት ይለጥፉ